Tlawmngaihna kan tih tak hi..

        Tlawmngaihna tiin Zoram tlang tluanah kan sawi huai huai thin a, kan chhuang a, Mizo nih tinuamtu niin kan ngai a, Mizo bik hliah hliahin kan hre bawk a, dik pawh a dik ngei a. Mahse hnam dang laka kan chhuan em em thin leh kan thlahtu, kan pipute nun hlui kan sawi chang a mawi kan tih em em thin tlawmngaihna hi thangtharte nunah hian a parchhuak zo ta nange a tih theih hial ta mai.

         Tun lai kan khawsak phung leh khawtlang nunah hian tlawmngaihna hi a tlahniam ta em em a, kawng tlemteah chauh tlawmngaihna tia sawi theih tur a ni ta. Chhiat tawk an awm nikhuaa kan inpui tawn tih loh hi chu tlawmngaihna hmel a lang ta mang lo. Chhiat ni a kan inpuih dan pawh hi a mawi zawnga tilui hram hram leh dan ang deuha ngaia ti ve hram hram, mi hmuha hmel mawi tumna lek a ang ta hle mai. Kan thinlungah tlawmngaihna hian hmun a chang tlem ta tial tial em ni le? Tu mawh nge ni ta ang le? Y.M.A nge, nu leh pa nge, mimal mawhphurhna tih hi zawhna pawimawh tak a ni ta.

        Ram changkang zel leh hmasawn zelin a ken tel ve tlat avangin mitin mahni hna theuhah kan tul em em tawh a, thlan laih, khawhar in riah leh mitthi lumen thlengin kan hman ta lo nge kan ngaihdan a phir ta zawk? Mizo kan niha kan tlawmngaihna avanga kan tih thin kha tunah chuan dan ang leh mi sawisel kan hlauh avangin kan tilui a, kan tlingtla ve hram hram a ni ta mai lo maw?

       Tun hma kha chuan mitthi buhfai leh thing khawn kha nula hoin an tihtur rengah an ngai hmiah a, lungawi tak leh thatho takin, tirh leh sawm chawp pawh ngai lovin an ti mai thin a, a mawiin a zahawm a, Mizo nih a tinuam thin. Tunah erawh chuan a ni ta hauh lo mai, tirh chawp leh hrilh chawp loh chuan mahni thu a tih nachang hria kan vang ta hle mai (Aizawlah bik). Hreh ngawih ngawih hmel pu leh phun phun chungte’n kan intir chhuak thei ta tawk a, a hrilhtu hnena “ka peih lo” tia lo chhang tawk lah bo lo. Mi ngaihah anmahni an mualpho mai bakah an nu leh pate thlengin an timualpho a ni.

         Heng zawng zawngah hian tu nge mawh phur ta ang le? Thenawmpa emaw Bialtu MLA emaw Chief Minister emaw mawhphurhna chu a ni thei hauh lovang. Nu leh pate hian kan fate hi tlawmngai turin kan zirtir miah lo nge kan hrilh a an zawm duh lo zawk? Kan fate’n khawtlanga an mawhphurhna neih ve ang ang te pawh an tihhlawhtlin duh loh hian kan zak ve tho nge zak miah lo zawk? Kan faten engmah an tih ve loh hian kan lawm zawk nge zah nachang kan hre lo? Chhiat ni that niah engmah ka tih ngai loh hian ka uang zawk nge ka zak ve tho? Mahni mawhphurhna hre lo leh hlen zo lo ka nih hian eng dinhmunah nge ka din? Mizo nun aia hnam dang nun ka ngaihsan avang hian hma ka sawn phah em? Hnam dang kan nih phah chuang em ni? Mahni hnam zia leh nun mawi chawisanga humhalh thiam apiang hi hnam ropui an ni zawk lo maw? Lo ngaihtuah ve teh!!