KA TAH KHUA SEI TUR

KA TAH KHUA SEI TUR -   Hruaia Chhangte, 3rd March 2004,Lpt

1. Sulhnu hmun hlui nghakin zawl khaw tlang nuamah,
  Mahte’n di tawng lo val ar ang ka vai,
  Zaleng zawng chu e chhailaidi tanga’n,
  Ning lote’n par ang an lawm, chhawrthlapui khi,
  Kei zawng tah hluan zai sain kan run riangah,
  Sih nau ang tlei zai ka rel thei lo.

2. Siamtu khuarel ka tan tuar a har ngei e,
  Thinlaiah nghilh ni reng i awm thei si lo,
  Hliappui run chul hnu fan chang ni hian,
  Ka thlir ngam lo lungrualtea kan lenna,
  Kum pui sul ang her zel ka dawn sei ngam lo,
  Chhingmit hawktui ang lo lian e.

3. Thlang tlai zamual pui tam her mah se
  Tham ral lo, i sakhmel ka di parte,
  Chhuak leh la turnipui, lenkawlah,
  Lungrual lai ni kawla liam tawh hnu kha,
  Her chhuak leh se aw! theih chang si lo maw?
  Nang ngaih lai puan ang bang i maw?

4. Nang zawng e hlimte’n rihsang mualah,
  Lalnunnema kiangah siang i lawi ta e,
  Kei zawng sulhnu hmun hlui nghak, ka riang em mai !
  Ka thlir ngam lo ni chhun zalam phei khanthuam,
  Lungchimtea par ang kan vulna,
  Tawn chang ni hian, parte, aw ! ka riang vawng vawng.

5. I dawn ve lo’m ni ka tah khua sei tur,
  Ka dawn khawlin lung reng a awi thei lo,
  Aw, theih se sul ang zuiin i lenna tlang
  Chuan ve ka nuam ni rei cham turin,
  Theih si lo maw hringchan pialleiah
  Tawn leh ni nghakin khuavel ka hrut ta’nge.

(I dedicated this poetry to Francise Lallawmawma of Ramthar veng, Aizawl)