Duhthlanna

DUHTHLANNA -   Hruaia Chhangte,   25th July,2007, 1:30 A.M


Ka zawt lova, mi chhang hek lo,
Kum sul tam beiseina a chuai ngai lova,
Leng dang tan ka phal loh kha,
Thliah hnu chhawl ang a uai em ni?
Tiin zawtin ka tir ngam lova,
Ka tan palai a hnar ngai chuang em ni?


Tawn changin tui ang nem thinlung hi
Tlawm makah a na leh si.
Ka huang chhungah thlahthlam a hlawh a,
Ban phak lohah ka tan a vul mawi thin.
Bum hmang thinlung hi hlauin a khur a,
Mi huai te chu ka thik leh thin.
A kiangah chuan tuk chhuak te hian
Mawina lal tiang an keng thin a,
Chung turni pawh ropuina puan var nen
Sen lai nau ang kan lawm thin a.
Zan thim leh chung chhawrthlapui paw’n
Zai mawi an rem, ngur ngai lo rengin,


Biahthu di thlun nan a riang ka tlai lua maw?
A chhing zo awm hian ka ring si lo,
Hmangaihna a luang hmun lo kan tawnah,
I tan leh ka tan ni thar ang an chhuak,
Lei ni kin hmain Mangtha tal chhawn thei maw?


Vanduai ruahbing ka tawnah a sur bang thei lo,
Kum sul tam malin ka tuar thin.
Ka chun leh zua lah kar hla danah an leng si.
Tumah rengin ka chan min dawn pui ngai lo,
Nang vangin nitin thlan thim chhungah
Ka rahpelh phurrit a zual zel si mi u.
Ka tumna ve chuan min hlat tir a,
Ka hriatthiamna chuan kawng dik lo min hmuh a,
Lamtluang dik lo nitin ka chhui a,
Ka zawh tumkawng apiang hlohna zel maw!
Chhuanlam siamin ka rilru a vakvai a,
Nitin rumin a vak ruai thin.
Hliam tuarin ka rilru pawh a mang zo ta,
Ka thlan khawhar pawh keima laih ngei maw!
Duhthlanna diklo vangin englai pawhin thahin ka awm ta !