PULAU SIRVATE NUNNEM

PULAU SIRVATE NUNNEM - Hruaia Chhangte, 19th Nov.2005 . Lpt.

Hmana an hril ‘Pulau’ sirvate nunnem,
Di lova kan len lai nghil nghial dawnin
Lung ka phang, tunah cho loh leng tawnah,
I thlung zawl thu a riang kan tah nan.

Dar khawpui sial ang tuai thar tleitiri,
Zawl thu di kimte’n puan ang ban mah i;
A riang val rual sul ang min tum nem maw,
Zeng kher nge thinlai lam ang ti-her-tu ?

A mi leng tawnan puan ang hlui tawh mah la,
Nghilh bik lo’ng che ‘The Pulau’ val tuai zawngte;
Ni chhun zalam tluang kan hrutna lam thuampuiah,
Thinlai phangin ‘Pulau’ val rual kan leng del del.

Ka zawlkhawpui awm khua hian mi dem lo u,
Lungleng chhailai di vai chhuihthangval lungmawl;
Kan chhuah lam tluang dai kil kawmah,
Lungdi vaiin val riang kan ding teu to.

Chaltuai di ngaih thinlaiah chhum ang a zing e,
Ka tlu ruai e, thiam zir kan tuanna tlangah;
Awmhar nau ang kan tap laikhum dawhsangah,
Tual lim lo val chham ang a zal reng mai.

Hmana dar ang kan chhai thaparmawite,
Tunah val dang cho lai di lawhleng siali;
A ngur runpui chhantling dar bangah sialin,
A thianga len tuahremin zawl thu a thlung.

Aw le, liam mai nang che lungdi tawnah,
Vul zel nang che vangkhaw mawitu chhawkhlei par;
Kan chawi zel nang che zai tin kung rimawi nen,
‘The Pulau’ val rual sirvate nunnem.

 (Pulau Gang members zawng zawngte hla atan.)

THLAH NAN

THLAH NAN  -  Hruaia Chhangte,  11th March 2006, 7:45 pm, Sat, Lpt.

1. Hmana suihlungruala kan len lai te,
  Thinlaiah a hlui lo, a thar reng si,
  Tunah samang Thenin leng dang i bel ta si,
  Thinlai rukah a na vawng vawng.

2. Mahriakten ka fang kan sul i hnu,
  Lungrualtea siang kan lawina run leh
  Tual chaina hmun hlui zawngte,
  Mahte’n ka vai, luaithli ka nul leh thin.

3. Nang nen samang then tawh mah ila,
  Nghilh bik suh aw, a riang val hi,
  Tunah tlei dang tang bel tawh mah ila,
  Nang ang renga thinlai hnem an awm si lo.

4. Parte, lam ang leta ka tang nem
  Buan ang pawm leh a rem tawh lo,
  Sul ang hawi lo’ng che chhailaidi tawnah,
  Fanau maltluan chawiin leng nang che.